Obernaar Rahel
Obernaar Rahel
1975 beni vom Aargau of Oute zöglet,
wo mi Vater aus Pfarrer het böglet.
Denn usem dörfleche Tüfschlof erwacht
het d‘Schuel i mer es Füür entfacht.
Er Metti vo tanzende Naare im Höbeli Singsaal
schtohn eg als Prinzässin am erschte Maskeball.
Dass dä Momänt so prägend wird si för mis Läbe,
loht me höt of Wolke 7 schwebe.
Vor Oberstufe a foht mehr zersch dr Sport a gfalle.
E schtoh drü Mou pro Woche i de Halle,
due Handball spele, Trainings leite
ond x-Johr im Vorschtand metarbeite.
Parallel, grad nach de Handeli Kanti Zit,
do han eg plötzlech Appetit,
of Reise, Schproche lehre, anderi Kulture
ond ofs Entdecke vo frömde Spure.
Zrogg i der Schwiiz ziehn eg gli us.
Met ere Fröndin hani e WG im Kino-Palace Hus.
Schaffe be Coop Schwiz ond be i mim Elemänt
als Schue-Ichöufer-Assischtänt.
Nochär höufi ir OMYA Papier ontersueche,
due s’Büro schmeisse ond Reise bueche.
Denn ziehts mi of Zöri is Banke Omfäud.
Eg kömmere mi be de SIX oms Plastikgäud.
Spezialisiere mi in Marketing & Kommunikation
wo bes höt esch mini brueflechi Passion.
Met 32i chonnt de d’Wändi
di sportlech Tätigkeit findet es Ändi.
Ha d‘Handballschue a Nagel ghänkt
ond mis Härz ganz de Fasnacht gschänkt.
E be 2000 zo de Rätschwyber cho
eis Johr spöter bereits ufgno
03 hei si mi aus Stobeschriberi i Zonftrot gwählt
Ond bes höt hani a keinere Setzig gfählt.
Ab denn hani mini kreativ Odere usgläbt
gnäit, gmolt ond met Heissliim kläbt
Värsli griimt, bem Wagbou assischtiert
Flyer kreiert ond musiziert.
Set zäh Johr amti bereits als Präsidänt
ond setze er Zonft mini Akzänt.
Mis private Glöck hani ganz plötzlech gfonde
07 im Banause Chäuer onde.
Ha met em MacSven vöu Zit verbrote
ond en zwöi Johr schpöter ghürote.
Es chlises Büebli hei mer becho
dä Eric macht eus täglech froh.
D’Fasacht het mer auso veles gschänkt
Won eg früecher nie hät dänkt.
Drom dank eg der, du schönschti Zit
Eg freue me, dass es dech git.
Fasnacht eg liebe de mit Lieb & Seel
Di Obernaar Rahel
